صوبہ سندھ کے علاقے ضلع بدین میں حالیہ بارشوں اور سیلاب کے باعث بے گھر ہونے والے تین بہن بھائی تیز رفتار ٹرک کی زد میں آکر جاں بحق ہوگئے۔
بدین کے سینئر سپرنٹنڈنٹ آف پولیس (ایس ایس پی) شاہنواز چاچڑ نے ڈان کو بتایا کہ سیلاب متاثرین گورلارچی میں حاجی امیر شاہ نالے کے قریب سو رہے تھے۔
ایس ایس پی کا کہنا تھا کہ ’صبح ساڑھے چھ بجے کے قریب جب سیلاب متاثرین سو رہے تھے، تو سامان سے بھرا ٹرالر اُن کے اوپر چڑھ گیا جس کی وجہ سے وہ موقع پر ہی جاں بحق ہو گئے۔
ایس ایس پی کے مطابق مرنے والوں کی شناخت 18 سالہ عنایت، 12 سالہ وسیمہ اور 10 سالہ سیما کے نام سے ہوئی ہے۔
واقعے کی اطلاع ملتے ہی پولیس موقع پر پہنچی، جائے حادثہ پر سیلاب متاثرین نے سڑک بلاک کی ہوئی تھی، اہلکاروں نے ٹرالر کو قبضے میں لے کر ڈرائیور اور کلینر کو گرفتار کرلیا جبکہ واقعے کے خلاف تقریباً 40 افراد نے احتجاج جاری رکھا۔
گولارچی اسٹیشن ہاؤس آفیسر (ایس ایچ او) اصغر ہالیپوٹو نے بتایا کہ ڈرائیور کی شناخت زین اللہ اور کلینر کی نور گل کے نام سے ہوئی ہے جبکہ گاڑی کو پولیس نے اپنی تحویل میں لے لیا ہے۔
ایس ایچ او نے ڈان کو بتایا کہ ٹرالر کوئلے سے لدا ہوا تھا اور اسلام کوٹ کے علاقے سے آرہا تھا۔
عہدیدار نے بتایا کہ جاں بحق افراد کو پوسٹ مارٹم کے لیے انڈس اسپتال منتقل کردیا گیا ہے۔
تیز بارشوں اور سیلاب سے صوبہ سندھ سب سے زیادہ متاثر ہوا ہے اور بدین سے 4 گھنٹے کی مسافت پر واقع دادو میں پانی کی سطح میں مسلسل اضافہ ہورہا ہے۔
.
