امارات میں ملازمت کے خواہش مند پاکستانیوں کو فراڈ سے بچانے کے لیے شاندار فیصلہ

دُبئی() متحدہ عرب امارات میں آنے والے اکثر پاکستانیوں کو نوکریوں کے معاملے میں دھوکادہی کاسامناکرنا پڑتاہے۔وہ ویزے اورٹکٹ پراچھی خاصی رقم خرچ کر کے جب امارات پہنچتے ہیں تو پتا چلتا ہے کہ جس نوکری اور پُرکشش پیکیج کااُنہیں خواب دکھایا گیا تھا اُس کا حقیقت سے کوئی سروکارنہیں۔اسی نوعیت کے اور بھی کئی مسائل پاکستانیوں کوپیش آتے ہیں۔ تاہم اس حوالے سے متحدہ عرب امارات اور پاکستان کے درمیان ایک مفاہمتی یاد داشت پر دستخط کیے گئے جس کے مطابق اگر کسی بھی پاکستانی کو متحدہ عرب امارات میں نوکری کی آفر ہوتی ہے تو امارات پہنچنے سے قبل اُس کے اور نوکری فراہم کرنے والی کمپنی کے درمیان ایمپلائمنٹ جاب آفر کے معاہدے پر دستخط کرنا لازمی ہوں گے۔

اس اقدام کی بدولت سمندر پار جانے والے اُن پاکستانی کارکنوں کے حقوق کاتحفظ ممکن ہو سکے گا جو اکثر جعلی ریکروٹمنٹ ایجنٹس کے ہاتھوں دھوکا دہی کا شکار ہو کر اپنی قیمتی رقم سے محروم ہو جاتے ہیں۔

پاکستانی وزارت برائے سمندر پار پاکستانیز کے مطابق وہ پاکستانی ریکروٹمنٹ کمپنیاں جو متحدہ عرب امارات میں غیر قانونی اور جعلی بھرتیوں میں ملوث پائی گئیں، اُنہیں بلیک لسٹ کر دیا جائے گا۔ اس شاندار اقدام کے باعث کوئی بھی پاکستانی پاکستان سے امارات کو روانہ ہوتے وقت ایمپلائمنٹ جاب آفر پر دستخط کرے گا، جس پر ایمپلائر کی جانب سے پہلے ہی دستخط کیے گئے ہوں گے۔ اس جاب آفر کی دستاویز میں کارکن اور ایمپلائر کے حقوق اور ذمہ داریوں کا واضح طور پربیان ہو گا۔ جبکہ دستاویز متحدہ عرب امارات میں متعلقہ ادارے کی جانب سے رجسٹر بھی کی جائے گی۔ مفاہمتی یادداشت کی شق نمبر 6میں واضح کیا گیا ہے کہ نوکری فراہم کرنے والے ادارے یا فرد کا اگر کسی پاکستانی کارکن سے کسی بات پر تنازعہ ہو جاتا ہے اور دونوں فریق چھ ہفتوں کے اندر خوش اسلوبی سے معاملات حل کرنے میں ناکام رہتے ہیں تو ایسی صورت میں یہ معاملہ عدالت کے سپرد کردیا جائے گا